ek lamha jo furqat ke siwa aur bhi kuchh tha ek gham jo qayamat ke siwa aur bhi kuchh tha ek chehra nigahon ke liye faiz-rasan tha ek khwab ziyarat ke siwa aur bhi kuchh tha ek naqsh tasawwur ke pare bhi tha mujassam ek wahm haqiqat ke siwa aur bhi kuchh tha ek dagh jo rakhta tha mere sine ko raushan ek nam jo tohmat ke siwa aur bhi kuchh tha ek saut-e-mahz raunaq-e-virani-e-dil thi ek gul dam-e-wahshat ke siwa aur bhi kuchh tha ek yaad khayalon ke alawa bhi thi maujud ek zakhm aziyyat ke siwa aur bhi kuchh tha ye daur qayamat ka jise hum ne guzara ek umr ki mohlat ke siwa aur bhi kuchh tha