ek pal mein tutne ko hai samundar ka sukut
ye ishaara kar raha hai ret ke ghar ka sukut

hum bahut pachhtae aawazon se rishta jod kar
shor ek lamhe ka tha aur zindagi bhar ka sukut

ho sake to kijiye ab zalzale ka ehtimam
warna dastak se nahin tutega is ghar ka sukut

koi to aawaz ubhre dil ke virane se ab
chatta jata hai mujh ko mere andar ka sukut

ek lamhe mein shafaq ke rang ko kajla gai
us ki pal bhar ki udasi us ka pal bhar ka sukut