ek safar hota raha aur ruk gai main
chal raha tha rasta aur ruk gai main

ishq tha donon ko fitrat mukhtalif thi
wo bhatakta hi raha aur ruk gai main

har dafa aawaz sun kar main palat di
phir na jaane kya hua aur ruk gai main

yaad ke lamhe mein ek arsa bitaya
waqt aankhon se baha aur ruk gai main

lams ka kaisa asar sanson pe hoga
khel mein us ne chhua aur ruk gai main

is qadar aankhon se us ko pi liya tha
mujh mein wo bahta raha aur ruk gai main

ja rahi thi chhod kar kirdar apna
nam aaya aap ka aur ruk gai main