ek samundar hai meri aankhon mein
gham ka manzar hai meri aankhon mein

tum sitaron ki baat karte ho
sara ambar hai meri aankhon mein

jis ne ranj-o-alam diye hain mujhe
wo sitamgar hai meri aankhon mein

yun to pardes mein taraqqi hai
par mera ghar hai meri aankhon mein

mere khwabon ka qatl karne ko
koi khanjar hai meri aankhon mein

tu kisi aur ka na ho jae
bas yahi dar hai meri aankhon mein

tum ko dil mein dikhai de ya na de
zakhm andar hai meri aankhon mein

sach to ye hai ke aaj bhi 'raunaq'
ek qalandar hai meri aankhon mein