ek sanwle badan se mohabbat qubul kar
ai rabb-e-ishq dil ki shahadat qubul kar

aankhon se meri us ke dupatte tak aaya hai
ai rabb-e-dard ashk ki hijrat qubul kar

sahra agar nahin hai to sahra se kam nahin
ai rabb-e-qais qalb ki wahshat qubul kar

dil ne abhi bichai hai ja-e-namaz-e-ishq
luknat-zada zaban ki iqamat qubul kar

main ne namaz chhod ke ek jaan bachai hai
mabud-e-lam-yazal ye ibaadat qubul kar