farq jab tak andheron ujalon mein tha
tum jawabon mein the main sawalon mein tha

ek ghazal kya kahi main ne tere liye
tazkira us ka kitne risalon mein tha

mere chehre pe raunaq thi lab pe hansi
in dinon jab zamana zawalon mein tha

aarzu us ki mere hi dil mein na thi
main bhi bachpan se us ke khayalon mein tha

machhliyan pyas se muztarib thin 'asad'
ban ke kali ghata abr baalon mein tha