fasl-e-bahaar jaane ye kya gul katar gai
saghar gulon ka khun-e-anadil se bhar gai

gulzar-e-hast-e-bud mein aarif ki aagahi
auraq-e-gul pe surat-e-shabnam bikhar gai

hasil huzur-e-husn ki sar-mastiyan kahan
tahzib-e-asr laut ke jaane kidhar gai

danishwaro wo ramz samajhne ki chiz thi
nazar-e-wafa-shiar khata jo bhi kar gai

khush-bakht gharq bahr-e-takalluf mein ho gae
tute hue nasib ki kashti guzar gai

gulshan ke dida-war hi tah-e-dam aa gae
jadu jaga ke khub nasim-e-sahar gai

shaistagi ne khair ka putla bana diya
barq-e-fana bhi husn-e-ada pe thahar gai

almas-o-lal bik gae mutlaq khazaf ke mol
ab aabru-e-hikmat-e-sahab-hunar gai

saqi ko khas masnad-e-gul par jo aai nind
sar-masti-e-sharab-e-gham-e-mo'atabar gai

itni thi ek nafas ke tabassum ke dastan
nazuk kali thi phul bani aur bikhar gai

yun to sukhan ki surat-e-mani thi dil-pazir
khun-e-jigar se aur haqiqat nikhar gai

tai ho sake khirad se na hasti ke marhale
nakaamiyon ki aah meri kaam kar gai

'bebak' be-kasi ke hai juz kaun dast-gir!
mauj-e-nafas hayat ki jaane kidhar gai