fikr-o-takhaiyyulat ke par zinda hain abhi
budhe zarur hain ye magar zinda hain abhi

sae mein zindagi ko bitane ke waste
rah-e-hayat ke wo shajar zinda hain abhi

us ko laga ki chahne wale nahin mere
lekin use mili ye khabar zinda hain abhi

mayus-o-na-ummid na honge kabhi bhi hum
ummid ke ye shams-o-qamar zinda hain abhi

hum ye samajh rahe hain ke wo mar chuke magar
apne hunar mein ahl-e-hunar zinda hain abhi

apni jagah hai tark-e-talluq ki khud-kushi
jo sath mein kiye the safar zinda hain abhi

apne gham-o-khushi ko chhupaen to kis tarah
'wajid' jahan mein ahl-e-nazar zinda hain abhi