gard hai zar hai sim hai zarra
shakl mein farq-e-mim hai zarra

yun to reza hai juz hai shama hai
kul mein lekin jasim hai zarra

mehr ki raushni mein rauzan se
dekho kitna azim hai zarra

kahin ye shams hai kahin ye qamar
jis jagah hai azim hai zarra

munqasim hone se hai jo mazur
ye wo durr-e-yatim hai zarra

puchhiye hurriyat-pasandon se
subh-e-nau ki nasim hai zarra

nukta-e-hikmat-o-tadabbur hai
jis jagah bhi muqim hai zarra

munqasim kaise hoen harf bhi qata
'hilm' lafz-e-qadim hai zarra