gard jam jae to shisha nahin dekha jata
yani taswir ko dhundla nahin dekha jata

tishnagi aa tujhe dariya ke hawale kar dun
tujh ko is haal mein pyasa nahin dekha jata

tum mera nam-o-nasab puchh rahe ho sab se
ishq ho jae to shajara nahin dekha jata

laut aane ki tasalli teri jhuti hi sahi
ab to mud-mud ke yun rasta nahin dekha jata

sher achchhe jo bure lagte hain duniya ko mere
ho ghazal mein tera charcha nahin dekha jata

log milte hain bichhadte hain magar kyon mujh se
yun tera chhod ke jaana nahin dekha jata

izz-o-tauqir ka ye haal hasad mein hum se
qad kisi ka bhi ho uncha nahin dekha jata