'ghaalib' ka rang 'mir' ka lahja mujhe bhi de
lafzon se khelne ka saliqa mujhe bhi de

teri nawazishen hain har ek khas-o-am par
dariya hai tera nam to qatra mujhe bhi de

sajdon ko mere phir teri chaukhat nasib ho
manzil talak pahunchne ka rasta mujhe bhi de

aakhir meri dua se asar kyon chala gaya
meri bhi sun le khushiyon ka tohfa mujhe bhi de

sab ki muraden aain bhari sab ki jholiyan
daman mera hi khali hai maula mujhe bhi de