ghairat ki zanjir tod kar aaya hun
apni hi taswir tod kar aaya hun

us ki taqat us ke kaam nahin aai
phulon se shamshir tod kar aaya hun

us ki zulfon se main bahar nikal gaya
khwabon ki tabir tod kar aaya hun

us ki aankhen pyar ki basti lagti hain
main nafrat ke tir tod kar aaya hun

jis ko allah rakkhe us ko kaun chakhe
dushman ki tadbir tod kar aaya hun

roti sare rishton ko jhutlati hai
rishton ki tasir tod kar aaya hun

'shad' ki baaten makkari ka jal koi
main us ka shahtir tod kar aaya hun