gham-e-dil rukh se ayan ho ye zaruri to nahin
ishq ruswa-e-jahan ho ye zaruri to nahin

lab pe har-waqt fughan ho ye zaruri to nahin
ham-nawa dil ki zaban ho ye zaruri to nahin

jaan-e-tanha pe guzar jaen hazaron sadme
aankh se ashk rawan ho ye zaruri to nahin

mil hi jaegi kahin dhundhne wale ko bahaar
har gulistan mein khizan ho ye zaruri to nahin

hum jise apni zaban se bhi na kahne paen
wo mohabbat ka bayan ho ye zaruri to nahin

un ki aankhon mein chhalak aae hain aansu jis se
wo mere dil ka dhuan ho ye zaruri to nahin

zabt bhi hota hai andaz-e-junun mein shamil
aarzu shola-ba-jaan ho ye zaruri to nahin

aarzuon ki bhi ek bhid hai shahr-e-dil mein
hasraton ka hi nishan ho ye zaruri to nahin

soch kar wadi-e-ulfat mein qadam rakh 'sahir'
sirf dil hi ka ziyan ho ye zaruri to nahin