gham ki jo lazzaten hain unhen jawedan bana
dard-e-nihan ko chaara-e-dard-e-nihan bana

ummid-o-yas jis mein na hon wo jahan bana
yani nai zamin naya aasman bana

aur aarzu-e-sair-e-chaman ko bahaar mein
aur ai asir-e-kunj-e-qafas aashiyan bana

mashq-e-wafa mein kya kahun ye gham-nasib dil
kin mushkilon se khugar-e-zabt-e-fughan bana

wahm-o-khayal par bhi tasallut hai barq ka
wahm-o-khayal mein bhi na ab aashiyan bana

takhrib hi mein jalwa-e-tamir tha nihan
jis shakh par mita tha wahin aashiyan bana

kah de zaban-e-haal se rudad-e-gham 'shifa'
apni khamoshiyon hi ko apni zaban bana