ghamon ki rah mein taskin ka maqam to hai
nahin hai subh-e-banaras awadh ki sham to hai

nahin hai gehun mayassar to jau ghanimat hai
nahin hai hur jo biwi siyah-fam to hai

nikamma chor uchakka sahi magar jaanan
tumhaare dil mein hamara koi maqam to hai

mere mizaj ki ranginiyan na dekho tum
tumhaare hath mein begam meri lagam to hai

na jaane patli gali se wo kab nikal lega
nahin hai t b ya b p magar zukaam to hai

bas itna soch ke khush hun main apni haalat par
faqir hi sahi par baadshah nam to hai

bane na hum jo minister to gham nahin 'wahid'
hamare sath mein chamchon ka izhdiham to hai