ghazab ki kat thi ab ke hawa ke tanon mein shigaf pad gae hain be-zaban chatanon mein hamare hont hi patthar ke hain wagarna miyan hum ek aag liye phirte hain dahanon mein bagula ban ke utha to main tha kharabe se bapa hua na koi hashr aasmanon mein siyah shahr ki qismat mein mera faiz kahan charagh-e-nazr hun jalta hun aastanon mein tapak pada hun bil-akhir main apni aankhon se chhupa rakha tha mujhe tum ne kin khazanon mein sukut ko na kabhi kar sada se aaluda ki ye zaban hai muqaddas-tarin zabanon mein sukhan-shanas fasilon ka hai sukut ghazab sukhan-taraaz hain zanjiren qaid-khanon mein