ghazal ghazal mein sataish tere jamal ki hai
ye dilkashi teri aankhon mein kis ghazal ki hai

utar di hai har ek ped ne qaba apni
khizan ki rut mein ada mausam-e-visal ki hai

hai dil ki dor mein bite hue dinon ka hisab
ki ek ek girah ek ek sal ki hai

mahak uthi wo jagah do-ghadi jahan baithe
ki sans sans mein khushbu tere khayal ki hai

kahi na us se kabhi dil ki baat is dar se
har ek baat pe aadat use sawal ki hai

khala se laut ke aaunga phir zamin ki taraf
mera uruj alamat mere zawal ki hai