ghazal wahi hai jo ho shakh-e-gul-nishan ki tarah
asar ho jis mein jamal-e-pari-rukhan ki tarah

samajh rahe the ki aasan hai ishq ki manzil
hawas udne lage gard-e-karwan ki tarah

agar hai dil mein kashish khud qarib aaenge
abhi to dur hain wo mujh se aasman ki tarah

masarraton ke khazine bhi us pe qurban hain
aziz mujh ko tera gham hai apni jaan ki tarah

suna hai jab se main khalwat-guzin hun kuchh ahbab
meri talash mein hain marg-e-na-gahan ki tarah

jahan jahan se guzarte hain ahl-e-ishq-o-wafa
nuqush-e-rah chamakte hain kahkashan ki tarah

sukhan-shanas na hon jis maqam par 'shaariq'
wahan hain sher-o-ghazal jins-e-raegan ki tarah