gulon ko rang sitaron ko raushni ke liye
khuda ne husn diya tum ko dilbari ke liye

tumhaare ru-e-munawwar ki zau mein dub gaya
falak pe chand jo nikla tha hamsari ke liye

sanam hazaron nae pattharon ke andar hi
tadap rahe hain abhi fann-e-azari ke liye

are o barq-e-tapan phunk de nasheman ko
taras raha hun gulistan mein raushni ke liye

rah-e-wafa mein mera kaun hai jo har su se
ghubar-e-rah uthi hai payambari ke liye

nikal pada hai junun tham kar ke dast-e-wafa
ek ajnabi ka sahaara hai ajnabi ke liye

jahan pe ishq ko sauda-e-gharz ho ai 'wahid'
wahi maqam hai ulfat mein khud-kushi ke liye