gulzar mein jo dur gul-e-lala-rang ho
wo be-hijabiyan hon ki nargis bhi dang ho

sayyaad o baghban mein bahut hoti hai salah
aisa na ho kahin gul o bulbul mein jang ho

afsos maut bhi nahin aati shab-e-firaq
wo kya kare gharib jo jine se tang ho

kafi hai boriya hi faqiron ke waste
mayub hai jo sheron ke ghar mein palang ho

ladne ko dil jo chahe to aankhen ladaiye
ho jang bhi agar to mazedar jang ho

jo dost hain wo mangte hain sulh ki dua
dushman ye chahte hain ki aapas mein jang ho

koi mare kisi ko khushi ho khuda ki shan
matam kisi jagah ho kahin nach-rang ho