haal na puchho roz-o-shab ka koi anokhi baat nahin
din ko kaise raat kahen hum raat bhi ab to raat nahin

lagne ko to sehn-e-chaman mein donon achchhe lagte hain
kanton mein jo apna-pan hai phulon mein wo baat nahin

dil se bhula to den hum un ko lekin is ko kya kije
sadiyon ki rudad bhulana apne bas ki baat nahin

gulshan gulshan shakh o shajar par roz nasheman jalte hain
kis ne kaha tha mausam badla agle se haalat nahin

ek zara si baat pe kyun hai itna hangama 'mumtaz'
shisha-e-dil hi to tuta hai aur to koi baat nahin