haalat ke dariyaon mein khatre ke nishan tak
chal paenge kya aap mere sath wahan tak

main mulk-badar sabr bhi kar sakti thi lekin
ye dekhna tha zulm ki sarhad hai kahan tak

khuddar tabiat ko guzarti hai giran-bar
jab tishna-labi jati hai khud aab-e-rawan tak

hum jurat-e-izhaar ke us daur se guzre
jis daur mein alfaz ki kanti thi zaban tak

ta-hadd-e-nazar bahta tha ek samt samundar
ek samt magar pyas se ainthi thi zaban tak