hae ye kaisa sitam ai sitam-ijad kiya
dil to ghar tha tera phir kyon ise barbaad kiya

kar liya jazb sitaron ne mere ashkon ko
main ne jab ro ke shab-e-hijr unhen yaad kiya

dekh wo ho gae ab aur bhi barham ai dil
tu ne kambakht ye kyon wa lab-e-fariyaad kiya

tere inkar ne wallah qayamat dhai
qasr-e-ummid-o-tamanna mera barbaad kiya

hichkiyan aane lagin naza' mein kyon mujh ko 'habib'
aakhiri waqt pe ye kis ne mujhe yaad kiya