hamein to gosha-nashin aur jahan bhi hona hai
yahan bhi hona hai hum ko wahan bhi hona hai

nishan bhi hai lagana nishan bhi hona hai
makan mein rahte hue la-makan bhi hona hai

is ehtiyat se karna hai zindagi apni
akela chalna hai aur karwan bhi hona hai

zamin mein rakhte hain paiwast apni duniya ko
zamin pe rahte hue aasman bhi hona hai

ek aisi qaid bhi ab khud pe yun lagani hai
zaban rakhte hue be-zaban bhi hona hai