hamin se apni nawa ham-kalam hoti rahi
ye tegh apne lahu mein niyam hoti rahi

muqabil-e-saf-e-ada jise kiya aaghaz
wo jang apne hi dil mein tamam hoti rahi

koi masiha na ifa-e-ahd ko pahuncha
bahut talash pas-e-qatl-e-am hoti rahi

ye barhaman ka karam wo ata-e-shaikh-e-haram
kabhi hayat kabhi mai haram hoti rahi

jo kuchh bhi ban na pada 'faiz' lut ke yaron se
to rahzanon se dua-o-salam hoti rahi