haq-bayani ke charaghon ko jala kar aa gaya
us ke dil ko raushni ka ghar bana kar aa gaya

ek diwana jise pyasa samajhte the sabhi
wo jhulasti ret pe dariya baha kar aa gaya

tha sakun darkar mujh ko khamushi ke shahar mein
is liye aawaz mitti mein daba kar aa gaya

shart thi gharqab hona han magar teri raza
phir samundar par koi rasta bana kar aa gaya

ek jugnu raqs karta tha fasil-e-hijr par
aur main pagal charaghon ko jala kar aa gaya