har lamha zindagi ke pasine se tang hun
main bhi kisi qamiz ke collar ka rang hun

mohara siyasaton ka mera nam aadmi
mera wajud kya hai khalaon ki jang hun

rishte guzar rahe hain liye din mein battiyan
main aadhunik sadi ki andheri surang hun

nikla hun ek naddi sa samundar ko dhundhne
kuchh dur kashtiyon ke abhi sang-sang hun

manjha koi yaqin ke qabil nahin raha
tanhaiyon ke ped se atki patang hun

ye kis ka dastakhat hai batae koi mujhe
main apna nam likh ke anguthe sa dang hun