har pal tha lala-zar abhi kal ki baat hai
har gul pe tha nikhaar abhi kal ki baat hai

jo dekhte hain chashm-e-hiqarat se ab mujhe
karte the mujh se pyar abhi kal ki baat hai

mere chaman mein kis liye pabandiyan hain aaj
tha mujh ko ikhtiyar abhi kal ki baat hai

jo dekh kar nigah bacha kar chale gae
karte the intizar abhi kal ki baat hai

'ramman' ko ab bhi apni mohabbat pe naz hai
tum ba-wafa the yar abhi kal ki baat hai