har sans har-nafas teri ek justuju lage
main hu kahan ki tu hi faqat chaar-su lage

sanson mein ab mahakti hai khayyam ki ghazal
har baat meri tujh ko chhalakta subu lage

utri hui qaba hai meri nila aasman
ashkon se mere dharti teri ba-wazu lage

aankhon se jis ko dekh rahe hain kuchh aur hai
mahsus ho raha hai so be-shak wo tu lage

sarmast hum hain aur wo main-pan mein mast hai
mera 'shafiq' kyon wo bhala ham-subu lage