harf raushan the numayan dard ki tahrir thi us ka chehra tha ki mere karb ki tafsir thi kuchh meri aankhon mein bhi tha dubte rangon ka aks us ghadi wo mohni surat bhi kuchh dil-gir thi an-ginat hisson mein yun taqsim ho kar rah gai zindagi jaise mere ajdad ki jagir thi hath phailae khadi thi jo bhare bazar mein wo mere iflas ki munh bolti taswir thi dekhti thi aane wali subh-e-nau ka rasta muntazir zindan-e-shab mein dukhtar-e-kashmir thi pujti thi har nai surat ko aawara nazar garche paon mein muqaddas ahd ki zanjir thi ek parinda par-shikasta aur suna rasta kis qadar sachchi mere haalat ki taswir thi