harif-e-sang hun mitti se pyar karta hun
lahu se apne gulabon mein rang bharta hun

qadam qadam pe tera intizar karta hun
main zindagi ke tajassus mein roz marta hun

badan ke zakhm sadaqat pe meri hanste hain
jab aaine ke takhatub se main guzarta hun

mere wajud se qaem hai kaenat magar
mita ke khud ko tujhe ba-waqar karta hun

na zauq-e-sahra-nawardi na azm-e-ham-safari
ajib log hain jis shahr se guzarta hun

fasad-e-shahr ne parda utha diya 'nashtar'
main rahzanon se kahan rahbaron se darta hun