harim-e-naz se aata hai bahra-war koi
dil aaina pe liye naqsh-e-fi-hajar koi

hisar-e-dard ki unchai badhti jati hai
khushi ki aandhiyan aa kar banaen dar koi

pada hai yaadon ke hujre mein qufl muddat se
hanuz deta hai dastak si mo'atabar koi

chamakti rah to nazron se hai abhi ojhal
charagh-e-charkh ki milti nahin khabar koi

ye sham dale hue tan pe surmai chadar
gila karegi siyah-shab se mukhtasar koi

tamam khwahishen khashak mein huin tabdil
ghadi mein shoala na kar de kahin sharar koi

teri zaban se lipti hai chashni-e-hawas
kahan se aae teri baat mein 'asar' koi