hawas-e-khalwat-e-khurshid-o-nishan aur sahi
dur hai subh to ye khwab-e-giran aur sahi

kuchh shikasta sa hai rangini-o-nikhat ka tilism
yahi bedad-e-khizan hai to khizan aur sahi

marhale danish-e-hazir ke to sab khatm hue
ek qadam jaanib-e-aqlim-e-guman aur sahi

meri palken bhi giran-bar rahi hain ai dost
ab ye aansu tere daman pe giran aur sahi

jalwa-e-husn-e-butan se hai agar dil ka ziyan
ai khuda-wand mere dil ka ziyan aur sahi

sainkadon rukh hain mohabbat ki kahani ke 'rawish'
ek andaz-e-hadis-e-digran aur sahi