ho chuka intizar sone de
ai dil-e-be-qarar sone de

mit gain raunaqen charaghon ki
lut gae rahguzar sone de

aahaton ke fareb mein mat aa
un ka kya e'tibar sone de

pi liye aansuon ke jam bahut
tutta hai khumar sone de

tu ne dekhi to hogi sham-e-khizan
ai mariz-e-bahaar sone de

unghta hai udas pedon par
chandni ka ghubar sone de

aakhir-e-shab na koi aaega
mere shab-zinda-dar sone de

dur us par dekhta kya hai
waqif-e-khu-e-yar sone de

ban gae hain hamare sine mein
hasraton ke mazar sone de