ho gae tum se juda yaad aaya
jo na hona tha hua yaad aaya

dil bhar aaya hai hamara kya kya
jab bhi wo ahd-e-wafa yaad aaya

main tujhe yaad na aaya lekin
tu mujhe subh-o-masa yaad aaya

tujh ko jitna bhi bhulana chaha
tu mujhe us se siwa yaad aaya

aib auron mein nazar aae bahut
kab kise apna kiya yaad aaya

is bayaban mein jo kal rahta tha
aaj wo aabla-pa yaad aaya

zindagi apni 'niyaz'-e-khasta
aisi guzri ki khuda yaad aaya