honge dil-o-jigar mein nishan dekh lijiye
tir-e-nazar pade hain kahan dekh lijiye

bagh-e-jinan mein lutf-e-aziyyat bhala kahan
duniya mein sair-e-jaur-e-butan dekh lijiye

aahen nikal rahi hain dil-e-dard-nak se
fauj-e-gham-o-alam ka nishan dekh lijiye

parde hi se na aaen wo bahar to phir unhen
kis tarah dekh lije kahan dekh lijiye

hindostan se chaliye su-e-karbala 'nasim'
wan chal ke sair-e-bagh-e-jinan dekh lijiye