hum jo dehat se shahron ki taraf aae hain
ishq aur husn ke bichhde hue hamsae hain

ek be-rang se mausam ki hawa chalti hai
ab na wo dhup na pedon ke ghane sae hain

kaun sa phul hamein yaad nahin bachpan ka
kaun sa rang jawani ka bhula pae hain

gard-e-ayyam-e-guzishta bhi to sath aai hai
hum tere pas akele to nahin aae hain

teri aankhen to ujale ki amin hain ab tak
ye andhere to kisi aur ne phailae hain