hum kinara kiye kinaron se
khela karte hain manjdhaaron se

hum guzarte hain khelte hanste
shola-zaron se kharzaron se

nam pate hain naseh-e-be-nam
hum se badnam baada-khwaron se

tuf ba-matlab-barari-e-yaran
uf ye atwar khaksaron se

jin ke dil mein gulon ki chahat hai
pahle wo surakh-ru hon kharon se

dil ki rahon mein bo liye kante
kar ke ummid gul-ezaron se

yun hai jumbish mein phul ki dali
wo bulate hain jun ishaaron se

yun to mah-wash hazar dekhe hain
tum juda ho magar hazaron se

bul-hawas hai raqib baatin mein
taur zahir mein jaan-nisaron se

ek fasana ki tha dayar apna
ek haqiqat ki be-dayaron se

tu ne ai dost sath kya chhoda
dil larazta hai ab sahaaron se

garm bazar hai mere fan ka
dad pata hun naqd-karon se

ruth jaen na wo kahin 'amir'
sher padhiye na yun ishaaron se