hum wo aawara ki jo dasht na ghar ke liye hain
jaane phir kaun si duniya-e-digar ke liye hain

jabr mausam ke hain jitne bhi shajar ke liye hain
un ko kya is se jo betab samar ke liye hain

raunaqen bhi to bujha deti hain aankhen aksar
kuchh nazare hain ki qatil jo nazar ke liye hain

ras aati hai bhala un ko kahan nan-e-jawin
log zinda ye faqat luqma-e-tar ke liye hain

tum to aflak se taron ki khabar le aae
hum pareshan abhi samt-e-safar ke liye hain