husain hi tha jo pyasa utha furaat se wo
lahuluhan samundar tha apni zat se wo

fasil-e-shab ki kamin-gahen us pe sab raushan
na jaane guzrega kab ja-e-wardat se wo

kiya na tark-e-marasim pe ehtijaj us ne
ki jaise guzre kisi manzil-e-najat se wo

parinde laut rahe hain khule baseron mein
gaya hai ghar se bhi lad kar guzishta raat se wo

na jaane kya hain ye dimak-zada si tahriren
dara dara sa hai bosida kaghzat se wo