husn-e-tamam ek din insan ban ke aa
aur kuchh nahin to mera hi arman ban ke aa

roz-e-azal se likhta raha hun jo dastan
ab aisi dastan ka unwan ban ke aa

jo log zindagi mein hain gham se shikasta-dil
zehnon mein un ke waqt ka tufan ban ke aa

mausam har ek de gaya hai tajrabe hazar
jo pyar de wo mausamon ki jaan ban ke aa

duniya mein teri main kabhi hazir na ho saka
lekin tu mere dard ka darman ban ke aa