is doshiza mitti par naqsh-e-kaf-e-pa koi bhi nahin
jhadte phul barasti barish tez hawa koi bhi nahin

ye diwaren aur darwaze sab aankhon ka dhoka hai
kahne ko har bab khula hai aur khula koi bhi nahin

chehre jaane-pahchane the ruhen badli badli thin
sab ne mujh se hath milaya aur mila koi bhi nahin

ek se manzar dekh dekh kar aankhen dukhne lagti hain
is raste par ped bahut hain aur hara koi bhi nahin

udta baadal chehre bunta aur mitata jata hai
lakhon aankhen dekh rahi thin lekin tha koi bhi nahin

jis ke bich ghira baitha hun dher hai bite lamhon ka
sab meri jaanib aae hain aur gaya koi bhi nahin

jalti mitti sukhe kante gahre pani tikhe sang
sab khatre panw ke niche sar pe bala koi bhi nahin

harf likhun to padhne wale kya kya nauhe sunte hain
kan dharun to in harfon mein saut-o-sada koi bhi nahin