is husn-e-be-karan ko khuda aagahi bhi de
dariya diya hai is ko to dariya-dili bhi de

khud ko na bhul jaun to kya sajda-e-wafa
allah mere ishq ko diwangi bhi de

us sang-dil se hum ko mohabbat ki aas hai
suraj se chahte hain hamein chandni bhi de

patthar ke ham-saron mein utara teri raza
ab kam se kam shuur-e-fan-e-azari bhi de

us ko agar diya hai chatanon sa karr-o-far
dariya ki mauj jaisi mujhe khud-sari bhi de