is jagmagate shahr mein sadkon ki raushni
kuchh dur to zarur meri ham-safar rahi

kaghaz ke chand purzon mein ghairat bhi bech di
majbur kar rahi thi bahut us ko muflisi

bahar nagar ke dhundhti phirti thi sham se
wo tirgi hayat ke sanche mein dhal gai

muddat ke ba'd aaina dekha tha bhul se
apni hi shakl aaj mujhe ajnabi lagi

meri wafaon se to shikayat hai aap ko
apne suluk par bhi nazar kijiye kabhi