is jahan mein koi mera na hua
ho gae sab khafa khuda na hua

wo haqiqat-pasand hain lekin
us ka wada kabhi wafa na hua

mujh pe hansti hai dhup ki wadi
sar chhupane ka aasra na hua

kya koi baat hai pas-e-parda
haq ada kar ke bhi ada na hua

meri nazren tiki hain farda par
haal jo bhi hua bura na hua

main mukhalif hun fikr-mandi ka
koi apna hua hua na hua

ye riya-kar daur hai 'nazim'
main numaish ko parsa na hua