is zist ki asas thi jaane kahan gai
aankhon mein jo ye pyas thi jaane kahan gai

milta nahin hai khud ka bhi saya kahin pe ab
ek raushni jo pas thi jaane kahan gai

sab kuchh to lut chuka hai faqat jism hai bacha
jine ki jo ye aas thi jaane kahan gai

jaane kahan kahan se khula hai mera badan
ek sharm hi libas thi jaane kahan gai

itna kasila ho chuka hai ab zaban ka swad
lahje ki jo mithas thi jaane kahan gai