ishq ki duniya ka ye dastur hona chahiye
qurbaton mein fasla manzur hona chahiye

sarw-qad simin-badan aankhen nashili surkh hont
aap ko thoda bahut maghrur hona chahiye

khud-ba-khud aa jaega tujh ko saliqa pyar ka
samne tere koi maghrur hona chahiye

gar tujhe mahsus karna hai mohabbat ka maza
pyar jo karta hai tujh se dur hona chahiye

gar tujhe tanqid karna hai kisi ke sher par
teri bhi koi ghazal mashhur hona chahiye