jaane kab tak qatar mein rahenge
hum tere intizar mein rahenge

tum isi bagh mein rahoge sada
hum isi kharzar mein rahenge

hum bichhadne ke baad bhi shayad
aap ke ikhtiyar mein rahenge

kitne manzar dikhai denge hamein
aur kitne ghubar mein rahenge

haal tafsil se batate hue
koshish-e-ikhtisar mein rahenge

sher sattar hazar kah dale
ek do to shumar mein rahenge

ek tanaza khada karenge naya
aur phir ishtihaar mein rahenge