jab bhi gulzar se lahu nikla
us ki takrar se lahu nikla

dekhte hi mere janaze ko
chashm-e-aghyar se lahu nikla

jab laga mujh pe ishq ka bohtan
mere kirdar se lahu nikla

muddaton baad diary kholi
sabhi ashaar se lahu nikla

budha hote hi ud gae panchhi
aur ashjar se lahu nikla

marne par us sharir ladki ke
yar akhbar se lahu nikla

dekh kar teri yaad mein rota
aaj diwar se lahu nikla

ulfaten dekh kar 'ali' un ki
mere inkar se lahu nikla