jab ghata jhum ke aati hai to pi leta hun
fasl-e-gul dhum machati hai to pi leta hun

chandni mein to kabhi chhanw mein taron ki kabhi
raat hans hans ke bulati hai to pi leta hun

ya kabhi teri judai ki sulagti hui sham
ruh mein aag lagati hai to pi leta hun

jab kabhi jashn manata hun gham-e-dauran ka
mai bhi us jashn mein aati hai to pi leta hun

kabhi haalat ki talkhi to kabhi fikr-e-jahan
gham-zada dil ko dukhati hai to pi leta hun

main kabhi khud nahin pita ki khuda shahid hai
aasman se utar aati hai to pi leta hun

apni har sham to be-mai hi guzarti hai 'payam'
bazm-e-mai-khana pilati hai to pi leta hun